الجواز والخلفة عطلوا حياتي الروحية أعمل إيه؟

إزاي أحقق مشيئة الله؟
مشيئة الله هي إيه؟ هي إن الجميع يخلصون وإلى معرفة الحق يقبلون. الحق هو مين؟ يسوع المسيح بيقول " أنا هو الطريق والحق والحياة.. ليس أحد يأتي إلا الآب إلا بي." طب إيه اللي مطلوب مني عشان أنال الخلاص؟ الخلاص عطية مجانية.. نعمة بنبقبلها بالصلاة وبالإيمان.. فنعيش حياتنا وهي ليها معنى وقيمة ورب يسود عليها.

الله قدوس ومجده ملء كل الأرض.. الإنسان مولود بالخطية وبيحب الخطية؛ وبالتالي العلاقة مستحيلة!
أي عمل صالح نعمله مش ممكن يرضي ربنا لأنه برضه مش هيوصل لمستوى قداسته.
طب إيه الحل؟ إزاي ربنا يرضى؟
هو حل واحد.. إن الله يشوفنا من خلال دم يسوع المسيح؛ لأن يسوع قدوس وبلا خطية.
لما بنقبله وبيكون مخلصنا الشخصي.. ساعتها الإنسان اللي في نظر الله ميت بالذنوب والخطايا بيبقى ابن ليه.. وده بسبب إن الصليب صالحنا عليه..

هو الله الظاهر في الجسد.
جه عشان يعيش زينا لكن بلا خطية ويكون مثال .. وطريق للآب.
تعاليمه حققت الارتقاء الروحي، وغيرت مفاهيم غلط عن الله.
صلبه وموته هدفهم إعادة الصلة بين الإنسان والله.

من حقك تسأل!

ليه أشكر ربنا على الصليب؟

إحنا بنشكر ربنا على الصليب لأنه حقق لنا المصالحة مع الآب.
إحنا مش بس مولودين بالخطية، لأ كمان جوانا حب الخطية.
قداسة الله ما تسمحش بعلاقة بينه وبين واحد مش قدوس.
لكن ماحدش من البشر قدوس.
كان لازم الله يشوفنا مبررين وبلا لوم.
دم يسوع هو اللي الآب بيشوفنا من خلاله بلا لوم.
ماحدش مهما عمل يعرف يوصل لربنا.
ربنا هو اللي في محبته وصل لنا.

هل بتـــــحب المـــــــــــــــــانــــجو؟
هل تحب إنك تزور القطب الجنوبي؟
هل انت خايف من المستقــــــــــــبل؟
فيه إجابة من تلاتة لكل سؤال من الأسئلة دي

• نعم
• لا
• مش متأكد

وإذا سألتك سؤال أخطر بكتير هل انت واثق إنك رايح السما ؟
هيبقى فيه إجابة من تلاتة. احنا هنوفر عليك وقتك وهنعرض عليك إجابات لناس اتسألت نفس السؤال. قارن إجابتك بيهم، وقارنها بإجابة كلمة الله _الكتاب المقدس.

• التفكير في الموضوع ده مضيعة للوقت. أنا مش هعرف الإجابة غير لما أموت.
• واضح إني فاشل في علاقتي مع ربنا. أنا خايف إني أروح الجحيم بعد كل ده.
• أنا واثق إني رايح السما لأن كلام الله بيقول كده في إنجيل يوحنا اصحاح 5 : 24
• أنا عارف إني رايح السما لأني فاكر اليوم اللي صليت فيه وقررت أكون مسيحي " حقيقي " ، و أولاد الله اللي قبلوه ليهم حياة أبدية معاه.
• أنا لا أجرؤ إني أقرر أنا رايح ولا لأ. الله وحده هو اللي يعرف.
• ساعات باحس إن الله بيحبني وهياخدني معاه السما. بس لما باكون محبط باحس إني ماستاهلش وإن مافيش أمل.
• لو الله بيحب الخطاة زي ما هو مكتوب لا يمكن يودي أي حد لغير السما.
• الثقة بتعتمد على حقيقة مش إحساس. أنا عارف إن الحقيقة هي في كلمة الله.
• أنا باحاول أبقى كويس عشان أستاهل أروح السما. لما أكون بتصرف كويس أكيد ده هيبقى في مصلحتي في الأبدية.

الإجابات دي، في ضوء تعاليم الله، منها اللي بتعكس عدم فهم للخبر السار، ومنها اللي بتعكس جزء كبير من الحقيقة، أو الحقيقة كلها.. انت كانت إجابتك إيه؟؟
" هكذا أحب الله العالم حتى بذل ابنه الوحيد؛ لكي لا يهلك كل من يؤمن به، بل تكون له الحياة الأبدية!"

الله مرتاح وانت تعبان؟!

قصة جريئة جدًا اتكتبت في السبعينات عنوانها " الله مرتاح وإنت تعبان ".
بتقول إن لما الحياة انتهت والناس واقفين قدام عرش الله العظيم، ماكانوش خجلانين أو خايفين، لكنهم كانوا منفعلين أوي.. ناس ومجموعات كتير كان ليها دعوى ضد الله بسبب اللي شافوه : عنصرية.. عبودية.. ظلم.. ذل... وكانوا بيقولوا " أد إيه الإله ده مرفه ! إزاي ربنا يقدر يحاكمنا؟ هو يعرف إيه عن الألم والشقا اللي شفناه! الإله اللي سكناه السما : لا تعب ولا أحزان ولا جوع أو كراهية!" واتكونت مجموعة ورفعوا دعوى مفادها إن الله علشان يحاكمهم لازم يدوق اللي داقوه هم ومروا بيه. وكل واحد حط شرط : " إنه يتولد على الأرض في شعب ذليل، يكون مشكوك في شرعية ميلاده، ويبقى صاحب قضية يطرد بسببها من المؤسسات الدينية التقليدية، ويدوق خيانة أصحابه ويتحاكم بظلم ويموت موتة بشعة...! "
كلمة الله بتتكلم عن السيد المسيح وبتقول :
" الذي إذ كان في صورة الله، لم يحسب خلسة أن يكون معادلاً لله.. لكنه أخلى نفسه، آخذا صورة عبد، صائرًا في شبه الناس! وإذ وُجد في الهيئة كإنسان، وضع نفسه وأطاع حتى الموت.. موت الصليب"

لدرجة الموت على الصليب ؟!

في يوم من الأيام، ركب ولد صغير سفينة كبيرة لأول مرة في حياته. وكان أبوه هو قائد السفينة. وفجأة هبت ريح شديدة جدًا، والمركب فضلت تتطوح يمين وشمال في عرض البحر؛ والركاب بيصرخوا ويبكوا.. لكن الولد كان لسه هادي ومبتسم! فسأله واحد من الركاب: انت ليه مش خايف زينا؟! رد عليه الولد بثقة وقال له: لأن أبويا هو قائد السفينة؛ وهو عارف إني راكب عليها!
الولد كان عنده حق يستمتع بإحساسه بالأمان؛ لأنه عارف حب أبوه ليه..
.. سؤالنا ليك   ( تحب قائد سفينة حياتك انت يبقى أبوك ؟؟ )
الفرصة قدامك، الله نفسه مقدمهالك: فرصة مجانية، إنك تكون ابن لله!
صلاتك ساعتها هتبقى علاقة شَركة شخصية مع الرب والسيد؛
تحكيله مشاكلك، تشكره بفرح، تكلمه بثقة، تستمتع بخطته لحياتك...
" انظروا أية محبة أعطانا الآب حتى ندعى أولاد الله !"

1. يعني إيه " تــَعـَدي على الله " ؟
2. ويعني إيه " حياة أفضل " في شخص يسوع المسيح؟
3. وازاي من حياة الخطية والتعدي أعيش الحياة الأفضل؟!

أسئلة تستاهل إنك تفكر فيها، وتاخد فيها قرار هيحدد كل حاجة في حياتك :
إنك تقدر بإيمان تصلي للسيد وتقول له " أبانا "
إن حياتك تكون مرضية أمام الله " لتكن مشيئتك "
إنك تستمتع بالشبع والكفاية " خبزنا كفافنا "
إنك تبقى مصدق في غفران الله ليك " اغفر لنا ذنوبنا "
إنك تختبر قوة الغفران والمحبة " كما نغفر للمذنبين إلينا "
إنك تتجه ليه هو " لا تدخلنا في تجربة، لكن نجنا من الشرير"
إنك تاخد الحرية من اللي ليه الملك والقوة والمجد!
كلمة في ودنك: الله مش بيدور على حد عايز يموت عشانه، لأنه " ونحن بعد خطاة مات المسيح لأجلنا" لكنه بيدور على حد عايز يعيش عشانه!
" لأنكم بالنعمة مخلصون، بالإيمان! وذلك ليس منكم. هو عطية الله!
ليس من أعمال كيلا يفتخر أحد؛ لأننا نحن عمله مخلوقين في المسيح يسوع لأعمال صالحة قد سبق الله فأعدها لكي نسلك فيها."

عمرك ما احترت من طرق تعامل الله مع الشعب في العهد القديم؟ يعني تفتكر الحل المنطقي للشفاء من لدغة الحيات المحرقة هو الحل اللي اداه الله لموسى النبي :
" اصنع لك حية محرقة، وضعها على راية. فكل من لُدغ ونظر إليها يحيا !"
الحقيقة إن الله عمل كده عشان يكلمك؛ عشان تدي له من وقتك دقايق وتفكر. هو يستاهل حياتك كلها مش بس دقايق..

1. الحية النحاسية دي كانت شبه الحية اللي سببت الموت.

والسيد المسيح اتجسد فيما وصفه الإنجيل " شبه جسد الخطية "
أخذ صورة عبد علشان يخلصنا من الخطية!

1. الحية اللي اترفعت في البرية كانت " خالية من السم " لأنها من نحاس!

ويسوع المسيح " لم يعرف خطية " لأنه من السما !

1. الحية اترفعت في البرية علشان كل الناس يبقى عندها فرصة

     تشوفها؛ وتتشفي..
والرب يسوع اترفع على الصليب عشان " يجذب إليه الجميع ".. أنا وانت.

1. اللي كان " بينظر " بيتشفي من لدغة الحية.

وكل اللي ينظر بإيمان للمسيح المصلوب ينال الغفران، والحياة الأفضل!
الدعوة ليك، إنك تنظر للمسيح المصلوب عشان تنال غفران وتتحرر من لدغة الخطية!
" كما رفع موسى الحية في البرية هكذا ينبغي أن يُرفع ابن الإنسان؛ لكي لا يهلك كل من يؤمن به، بل تكون له الحياة الأبدية ."

فيه دقايق ولحظات، ومواقف واختيـارات، ممكن تغير شكل حياتنا كلها_ واحنا سايبين هنا أسئلة بسيطة مش هتاخد دقايق؛ لكنها مرتبطة بأهم قرار في حياتك..
الله بيحبنا جدًا! ومهما عملنا : أعمالنا هي مجرد رد فعل لحبه العظيم..
الرب يسوع هو الحق؛ هو قال:
 "أنا هو الطريق، والحق، والحياة.. ليس أحد يأتي إلى الآب إلا بي"
لو ثبتنا في الحق، وعشنا حياتنا عشانه، مش بس هنفوز بحياة أبدية مع شخص الله نفسه، لكن حياتنا هتتغير هنا على الأرض وهنستمتع بإن إلهنا العظيم هو أبونا الحِنَيِّن.. ونعيش هنا، وفي الوطن السماوي، حياة جديدة.. حياة أفضل!

بيحكي أحد الفلاحين إن الملك بتاعهم نزل يزور قريتهم ولاقاهم قاعدين بيزرعوا؛ فطلب منهم إنه يشتغل معاهم. كلهم رفضوا وقالوا له : إزاي؟! تدوس في الطين وتمسك الفاس وهدومك تتوسخ زي الناس! لأ، جلالتك تؤمر واحنا ننفذ – شاور واحنا نتحرك وجلالتك على كرسي العرش..
لكن الملك صمم، ومين يقدر يرفض طلب الملك؟!
قالوا له: أمرك يا جلالة الملك. إحنا رفضنا من حبنا فيك، وإكرامًا ليك.. مش عايزينك تنزل للمستوى ده: عايزينك دايمًا عالي. وانت صممت لأنك عايز تشاركنا أفراحنا وأحزاننا، وتشجعنا وتحببنا أكتر في شغلنا.
بيقول اللي بيحكي القصة : لما فهمناه حبيناه بجد، وقدرناه أكتر؛ بنثق فيه وبنطيعه، لأننا عرفنا على بساطتنا إنه معانا مش ضدنا، وإنه أب لينا كلنا. مابيحكمناش من برج عاجي، لكننا شفنا محبته وهو بيشعر بينا ف شغلنا: بيتألم وبيتعب وبيعرق زينا!
السيد المسيح هو "كلمة الله" .. في البدء كان الكلمة. والكلمة كان عند الله. وكان الكلمة الله. والكلمة صار جسدًا وحل بيننا!
الله سبحانه لم يتعالَ، لكنه تنازل علشان بيحبنا.. واحنا بنحبه لأنه هو " أحبنا أولاً ".
"الله بين محبته لنا لأنه ونحن بعد خطاة مات المسيح لأجلنا"
فهمت أكتر عن إله الرحمة والحق؟